有冇人爸爸覺得BB好危險？
呢個係真人真事，屋企有BB嘅話都可能會有CCTV去幫手監察BB嘅情況，我聽過有爸爸係咁樣用CCTV嘅，因為佢怕左湊BB，佢會打開CCTV避開所有難攪嘅事，當有自己解決唔到嘅事，就會避開晒佢。
我相信唔少爸爸對於BB出世之後都未有太大嘅感覺。因為我哋由人哋個仔突然間變咗做人哋個爸爸。呢個身份就算老婆十月懷胎，比夠時間我哋做心理準備，仍然都會自覺未準備好。當自己小朋友一出世嘅一刻，先至真正感受到：「原來自己做咗老竇啦。」
正因為我哋冇咗十月懷胎嗰種經歷，同小朋友嘅聯繫好多時係由出世見到「實物」先至開始。所以我哋學做老竇嘅起步點永遠俾老婆遲，再加上爸爸呢種「生物」，本性上實在有太多唔細心嘅地方，所以對比女性，我哋成日都俾人話係—-豬隊友。
我相信各位爸爸都唔係想俾人叫豬隊友嘅，唔識嘅咪學到識囉，冇人一開始就知道點樣做人爸爸 ，當然男人嘅能力絕對係一個不能被忽視，當一個男人認真起上嚟，絕對唔講得笑！
所謂命運取決於心態，唔想俾人標籤做豬隊友嘅，就要學識點樣做人爸爸。第一樣要做嘅係剔除一個限制性嘅信念—— BB一啲都唔危險。當我地同小朋友正式聯繫嘅時候，你就會發覺呢嚿小粉團，同樣努力地，跟你建立關係。
當你哋嘅關係開始建立，你就會發現同佢嘅心係有交流，呢種交流只有你同佢獨有。因為爸爸嘅角色係獨一無二，就算媽媽都不能夠取代爸爸嘅角色。
所以，唔介意俾人當做豬隊友嘅，真心幫唔到你。但如果想發揮爸爸嘅獨有角色，唔想出現佢地一俾你抱就喊、點都要黏住媽媽、更甚係黏住工人姐姐都唔願意同你一齊既，就由今日起放低「BB好危險」呢種心態，唔好俾呢種諗法限制住你同BB建立親密關係。
#Vinic爸爸育兒手記
#港爸6A教育
#港爸講爸
#港爸圍爐
Vinic 爸爸 育兒手記 